هذي الشروط تنطبق على أي طلب من متجر Ha Design (hadesignkw.com)، متجر بالكويت للقطع المطبوعة بالطباعة ثلاثية الأبعاد. لما ترسل طلب من الموقع، معناه إنك قريت هالشروط ووافقت عليها.
١. شلون يمشي الطلب
تختار القطعة والحجم، وتكتب التفاصيل وترفق الصور، وترسل الطلب. ما تدفع شي وقت الطلب.
نتواصل وياك على الواتساب ونأكد التفاصيل والسعر.
نصمم القطعة ونرسل لك التصميم تعتمده أو تطلب تعديل عليه.
بعد ما تعتمد التصميم يوصلك رابط الدفع، وأول ما تدفع نبدأ الطباعة.
٢. الأسعار
كل الأسعار بالدينار الكويتي.
بعض القطع سعرها ثابت مثل ما تشوفه بالموقع، مثل الميداليات والبروشات والستاند.
بعض القطع سعرها بالموقع تقريبي، لأنه يعتمد على الحجم والوزن النهائي بعد التصميم. ومجسم السيارة سعره يبدأ من الرقم المكتوب حسب الحجم. والقطع اللي نصممها حسب الطلب، مثل «شي مخصص»، سعرها يتحدد حسب التصميم.
بكل الأحوال، نأكد وياك السعر النهائي قبل ما نرسل لك رابط الدفع، وما يتغير بعد ما تدفع.
٣. الدفع
الدفع يكون عن طريق رابط دفع نرسله لك بعد ما تعتمد التصميم، أو بعد ما نأكد طلبك إذا كان منتج ما يحتاج تصميم. والطباعة ما تبدأ إلا بعد ما تدفع.
تقدر تدفع بأي طريقة من الطرق اللي تطلع لك بصفحة الدفع.
الدفع يصير عن طريق شركة UPayments، المرخصة من بنك الكويت المركزي. بيانات بطاقتك تنكتب بصفحة الدفع عندهم، وإحنا ما نشوفها ولا نحفظها.
كل المبالغ بالدينار الكويتي.
٤. التعديل والإلغاء
تقدر تلغي طلبك ببلاش في أي وقت قبل ما تعتمد التصميم.
أول تعديلين على التصميم ببلاش. أي تعديل بعدها، أو تغيير بالفكرة نفسها (مثل نوع السيارة أو الجهة)، ممكن يكون عليه رسوم بسيطة نتفق عليها وياك قبل ما نبدأ فيه.
القطع المطبوعة، بعد ما تدفع ما نقدر نلغيها ولا نرجع المبلغ، لأنها تنطبع لك بالذات. إلا إذا كان فيها عيب، شوف بند «إذا فيه مشكلة بالقطعة».
٥. ترجيع واستبدال المنتجات الجاهزة
هالبند يخص المنتجات الجاهزة اللي مو مطبوعة، مثل بكرات الفلمنت. أما أي قطعة مطبوعة فما يشملها الترجيع، إلا إذا كان فيها عيب.
تقدر ترجعها أو تستبدلها خلال ١٤ يوم من يوم ما تستلمها.
بشرط تكون بحالتها الأصلية مثل ما استلمتها: مسكّرة، مو مفتوحة، وما فيها أي تلاعب.
توصيل القطعة لنا يكون على حسابك ومسؤوليتك.
تواصل ويانا على الواتساب ونرتب وياك الترجيع أو الاستبدال.
٦. إرجاع المبلغ
إذا استحقيت ترجيع مبلغ، يرجع لنفس الطريقة اللي دفعت فيها. ووصوله لحسابك يعتمد على البنك، وعادةً ياخذ من ٧ إلى ١٤ يوم عمل.
٧. مدة التجهيز
مدة التجهيز مكتوبة تحت كل قسم بالموقع، وتبدأ من بعد الدفع. المدة تقديرية وممكن تزيد شوي وقت ضغط الطلبات، وإذا صار تأخير نبلغك على الواتساب.
٨. التوصيل والاستلام
التوصيل داخل الكويت بـ ٢ د.ك، وينضاف على الفاتورة قبل الدفع.
الاستلام ببلاش، ونرسل لك اللوكيشن وموعد الاستلام على الواتساب.
لازم يكون العنوان ورقم التلفون صحيحين. إذا ما قدرنا نوصل لك بسبب عنوان غلط أو ما رديت، ممكن تنحسب عليك رسوم توصيل ثانية.
٩. طبيعة القطع المطبوعة
القطع مطبوعة طبقة طبقة، فطبيعي تبين خطوط خفيفة على سطحها.
الألوان على الشاشة ممكن تختلف شوي عن لون الخيط الحقيقي.
المجسمات نصممها على شكل الصور اللي ترسلها، وكل ما كانت الصور أوضح طلعت القطعة أدق.
١٠. إذا فيه مشكلة بالقطعة
إذا استلمت القطعة وفيها عيب بالطباعة، أو انكسرت بالتوصيل، أو ما تطابق التصميم اللي اعتمدته، تواصل ويانا على الواتساب أول ما تستلمها وأرسل صورة لها. نشوف المشكلة وياك، وإنت تختار: نصلحها أو نعيد طباعتها لك، أو نرجع لك فلوسها.
١١. الصور والتصاميم اللي ترسلها
لما ترسل لنا صورة أو شعار أو تصميم، يعني إنه ملكك أو عندك إذن تستخدمه، وتتحمل مسؤولية هالشي.
مثلاً: شعارات الشركات والأندية، والشخصيات الكرتونية، والرسمات المأخوذة من النت، وصور أشخاص بدون علمهم. هذي كلها لها أصحاب، ونقدر نعتذر عن طباعتها.
ونقدر بعد نعتذر عن أي طلب فيه محتوى مسيء أو مخالف لقوانين الكويت.
ما ننشر صور قطعتك بحساباتنا، مثل الانستقرام، إلا بموافقتك.
١٢. تعديل الشروط
ممكن نحدّث هالشروط مع الوقت، وتاريخ آخر تحديث مكتوب فوق. أي طلب ينطبق عليه نص الشروط اللي كان موجود وقت ما أرسلته.
سياسة الخصوصية
نطلب منك البيانات اللي نحتاجها عشان نسوي طلبك ونوصله لك وبس، وما نبيعها ولا نعطيها أحد لأغراض إعلانية.
الاقتراحات والشكاوى: اللي ترسله من صفحة «المزيد»، ورقمك إذا حطيته.
الحساب (اختياري): إذا سجلت حساب، نحفظ اسمك ورقمك وعنوانك وطلباتك عشان تشوفها من أي جهاز. كلمة السر تنحفظ مشفرة، وحتى إحنا ما نقدر نشوفها.
الإشعارات (اختياري): إذا فعّلتها، نحفظ اشتراك جهازك عشان نرسل لك تحديثات طلبك. والعروض والجديد ما توصلك إلا إذا اخترت «طلباتي والعروض»، وتقدر تطفيها بأي وقت من «حسابي» أو صفحة طلبك. وتقدر توقف الإشعارات كلها من إعدادات جهازك.
شلون نستخدمها
عشان نصمم القطعة ونطبعها.
عشان نتواصل وياك على الواتساب بخصوص طلبك.
عشان نوصل لك الطلب، أو نرتب وياك موعد الاستلام.
عشان تقدر تتبع طلبك من صفحة «تتبع طلبك»، ويوصلك إشعار لما تتغير حالته إذا فعّلت الإشعارات.
واتساب المتجر
اللي يرد على واتساب المتجر مساعد ذكي (ذكاء اصطناعي) يجاوب أسئلتك، ويعطيك حالة طلبك، ويأكد استرجاع حسابك إذا نسيت كلمة السر. وحبيب يتابع المحادثات ويرد بنفسه على اللي ما يقدر عليه المساعد. المساعد يشوف بس طلبات الرقم اللي يراسله، وما يعطي معلوماتك لأحد ثاني. ورسايلك تمر على مزود خدمة الذكاء الاصطناعي عشان يقدر يرد عليها.
وين تنحفظ ومين يشوفها
بيانات الطلبات والصور تنحفظ على خوادم آمنة للموقع.
نعتمد على مزودي خدمات تقنية لتشغيل الموقع وتجهيز الطلبات، مثل الاستضافة والتنبيهات وأدوات التصميم والرد على الواتساب والدفع. هذيل يوصلون بس للي يحتاجونه عشان يسوون شغلهم، وما يستخدمون بياناتك لأي غرض ثاني.
ما يوصل لبياناتك أحد غيرنا وغير هالمزودين.
البيانات اللي على جهازك
الكيس وبيانات التواصل اللي تكتبها تنحفظ على جهازك بس، عشان ما تضيع لو سكرت الصفحة. تقدر تمسحها بأي وقت من صفحة «المزيد» ← «امسح البيانات المحفوظة».
الموقع يحفظ بعد رقم عشوائي على جهازك نعرف منه عدد الزيارات، وهالرقم ما فيه أي معلومة عنك. وما نستخدم إعلانات ولا أدوات تتبع من شركات ثانية.
حقوقك
إذا عندك حساب، تقدر تعدل اسمك وعنوانك وكلمة السر ورقم تلفونك بنفسك من «المزيد» ← «حسابي» ← «بياناتي» (تغيير الرقم يتأكد برسالة واتساب من الرقم الجديد)، وتقدر تحذف الحساب من نفس المكان. وبدون حساب، تواصل ويانا على الواتساب ونعدلها لك. طلباتك اللي سويتها تظل عندنا للتوصيل والفواتير.